Nunha primeira aproximación experimental, estudamos o efecto da música na maneira na que se modifica a expresión dos nosos xenes. Para iso, recollemos mostras biolóxicas de centos de persoas antes e despois dun estímulo experimental (por exemplo, nos concertos experimentais) e analizamos as moléculas de ARN que xorden froito da expresión do ADN. Os estímulos realízanse nun contorno controlado. Por exemplo, nos concertos experimentais de Sensogenoma (Sensogenoma22, Sensogenoma23…), o público acode a un concerto de música clásica cun repertorio interpretado pola Real Filharmonía de Galicia no Auditorio de Galicia; neste contorno, instálanse ducias de postos de enfermería para recoller mostras biolóxicas xusto antes, durante e despois do concerto. Noutros contextos experimentais, recóllense mostras lonxitudinais en períodos máis prolongados, con obradoiros que van desde a interpretación musical, a audición de música ou o canto.

Detrás do proxecto Sensogenoma hai un grupo multidisciplinar de biólogos, xenetistas, matemáticos, bioinformáticos, médicos, enfermeiros, farmacéuticos, músicos, etc. Hai moitas liñas de experimentación abertas, enfocadas na análise doutros biomarcadores (metaxenómica, epixenómica, etc.).